भलवारी जेसीजको नयाँ नेतृत्व सर्वसम्मत चयन, अध्यक्षमा भट्टराई

बुटवल । रूपन्देहीको तिलोत्तमा नगरपालिकामा क्रियाशील भलवारी जेसीजको नयाँ नेतृत्व सर्वसम्मत चयन भएको छ । शाखाको आज (बुधबार) सम्पन्न एक्काइसौं अधिवेशनबाट चन्द्रप्रसाद भट्टराई (जीवन) को नेतृत्वमा वर्ष २०२४ का लागि नयाँ कार्यसमिति चयन भएको हो । नवनिर्वाचित अध्यक्ष भट्टराई रियलस्टेट र नर्सरी व्यवसाय तथा मोडलिङ् पेशामा आवद्ध छन् ।

नवनिर्वाचित समितिका कार्यकारिणी उपाध्यक्षमा अरूण पन्थी र प्रेमनारायण पंगेनी (अमित), उपाध्यक्षमा राजन सुवेदी, भुवन अधिकारी, लक्ष्मण ढुंगाना र शंकर आचार्य चयन भएका छन् । त्यस्तै, नयाँ समितिका सह–सचिवमा सागर भुसाल र सह–कोषाध्यक्षमा नितिश पाण्डे विजयी हुनुभएको प्रमुख निर्वाचन आयुक्त किशोर पंगेनीले जानकारी दिए ।

निर्वाचन सम्पन्न भएलगत्तै वर्ष २०२३ र वर्ष २०२४ को संयुक्त बोर्ड बैठकले आगामी पौषको तेश्रो साता पदहस्तान्तरणको कार्यक्रम गर्ने वर्ष २०२३ का अध्यक्ष माधवप्रसाद पाण्डेयले जानकारी दिए।

पदाधिकारी निर्वाचनअघि निर्वाचन आयुक्त एवम् शाखाका पूर्व अध्यक्ष मुक्तिनाथ गैह्रेले उम्मेदवारी प्रशिक्षण दिए भने पूर्व अध्यक्ष मनोज आचार्यको प्रमुख आतिथ्यमा शाखाको २२ औं साधारण सभा सम्पन्न भएको थियो । साधारण सभाले महासचिव जीवन भट्टराई र कोषाध्यक्ष मीनप्रसाद तिवारीको प्रतिवेदन सर्वसम्मत पारित गरेको उपाध्यक्ष रूपेश पाण्डेले जानकारी दिए।