add frist

गृहपृष्ठ पार्टी फुटेको होइन, काँचुली फेरेको जस्तै हो : उपमहासचिव पौडेल

पार्टी फुटेको होइन, काँचुली फेरेको जस्तै हो : उपमहासचिव पौडेल

"लुम्बिनी प्रदेशमा विभाजनको प्रभाव छैन"

बुटवल । नेकपा एमालेका उपमहासचिव तथा पूर्वअर्थमन्त्री विष्णुुप्रसाद पौडेलले अध्यादेशमार्फत एमालेबाट विभाजित भएर बनेको माधव नेपालको पार्टीलाई ‘सर्पको काँचुली’ को संज्ञा दिंदै नेता पौडेलले यसले बलियो जनाधार भएको एमालेमा कुनै असर नपार्ने बताएका छन् ।

प्रेस चौतारी नेपाल रुपन्देहीले बुधबार बुटवलमा आयोजना गरेको पत्रकार भेटघाट कार्यक्रममा बोल्दै उपमहासचिव पौडेलले एमाले विभाजन नभएको र विभाजन गर्न खोज्ने कोसिस भइरहेको बताए । उनले विभाजन गर्न खोज्नेहरु आफै पतनको बाटोमा रहेको उनले दाबी गरे । पार्टी फुटेको होइन, काँचुली फेरेको जस्तै हो नेता पौडेलले एमालेमा विभाजन ल्याउने कोसिस गरेपनि त्यो काँचुली फेरेको जस्तै भएको र त्यसले एमालेलाई कुनै असर नपार्ने दाबी गरे ।

‘हाम्रो आन्दोलनमा जुन खालको प्रवृत्ति देखिएको छ, त्यो पात्रलाई काँचुली छोडे जस्तै गरि छाडेको मात्रै हो’ उनले भने–‘काँचुली फेरेजस्तै हो, विभाजनले कुनै असर राख्दैन ।’ एमालेको जनाधार र संगठन ठूलो शक्तिकै रुपमा रहेको बताउँदै नेता पौडेलले आउने चुनावमार्फत् एमाले नै देशको ठूलो पार्टीको रुपमा निर्वाचित भएर सत्तामा पुग्ने ठोकुवा गरे ।

उनले नेकपा कालमा र त्यसपछि एमाले बनेका बेलामा पनि पार्टी भित्रका सामान्य मतभेदलाई लिएर माधव नेपाललगायतका केही नेताहरुले पार्टी र कम्युनिष्ट आन्दोलनविरुद्ध जघन्य अपराध गरेको आरोप लगाए । ‘दाजुभाईको सामान्य झगडामा रिस उठ्यो भनेर आमामाथि बञ्चरो प्रहार गर्ने अपराध भयो’ उनको भनाइ थियो । उनले पार्टीको आमा जस्तै रहेको प्रष्टाए ।

नेता पौडेलले एमालेमा विग्रह ल्याएर नयाँ समूह बनाउने माधव नेपालहरुको पार्टी पानीको फोका जस्तै हुने बताए । नयाँ पार्टी बनाउनेहरुले देउवा र प्रचण्डसँग ओत लाउने ठाउँ माग्दै हिँड्नुुपरेको उनको भनाइ छ । माधव नेपालहरुलाई लक्षित गरेर नेता पौडेलले भने ‘आमाको दूूधको चुसेर भएन, बाउको घुुँडा चुसेर हुन्छ र ?’

नेता पौडेलले सम्मानित अदालतले गरेका आदेश मान्नैपर्ने भएकाले आफुहरुले मानेको बताए । ‘तर,अदालतको आदेशले शक्ति पृथकीकरणको सिद्धान्तलाई लत्याएको छ र संसदको सर्वोच्चतालाई कुल्चेको छ’ पौडेलको भनाइ । संसदीय दलको ह्वीप नमान्ने, अनुशासन उल्लंघा गर्नेलाई दलले कारबाही गर्न नपाउने भन्ने जस्तो अदालतको आदेशले बहुदलीय ब्यस्थालाई नै गिज्याएको उनले बताए । अदालतबाट भएका आदेश र त्यसले पार्ने दुरगामी प्रभावका बारेमा इतिहासमा समीक्षा हुने उनको भनाइ छ ।

माधव नेपाल र अरु केही कम्युनिष्ट नेताहरुले कम्यूनिष्टका नेता नेतृत्वको सरकार गिराएर दक्षिणपन्थी शक्तिलाई गोलबन्ध गरेर जनादेश विपरितको सरकार बनाएको टिप्पणी गरे । ‘काम गर्ने दक्षिणपन्थीको अनि भन्ने वामपन्थी रु यो त भद्धा मजाक भएन र र ?’ उनको टिप्पणी थियो ।

नेता पौडैलले देउवा सरकार र गठबन्धनले एमालेको जनाधार कमजोर बनाउने गलत सोंच र पार्टी नै विभाजन गर्ने कुत्सित् उद्देश्यले अध्यादेश ल्याएको टिप्पणी गरे । उनले यो अध्यादेशलाई निरन्तरता दिन र संसदबाट पारित गर्न सरकारलाई चुुनौती दिए । ‘संसदको कानुनी हैसियतमा निरन्तरता दिन सरकार तयार छैन, केबल एमाले विभाजनकै लागि मात्रै ल्याइएको हो प्रष्टै छ’ उनको भनाइ थियो । नेता पौडेलले राज्यशक्तिको दुरुपयोग गरेर एमालेलाई किनारा लगाउन सकिन्छ कि भनेर केही तत्व लागेका तर, त्यो कदापी सफल नहुने उल्लेख गरे ।

प्रतिनिधिसभाका सभामुख अग्नीप्रसाद सापकोटाले सभामुखको पदीय मर्यादा विपरित भूमिका निर्वाह गरिरहेको नेता पौडेलले आरोप लगाए । सभामुखको जुन भूमिका, पदीय मर्यादा र सीमा हो त्यसलाई लत्याएर एउटा पार्टीको नेताका रुपमा र जसरी पनि एमालेलाई विभाजन गर्ने मतियारका रुपमा सभामुख प्रस्तुत भएको दाबी गरे । पार्टी निर्णयको उल्लंघन गर्ने १४ जना सांसदलाई एमालेले पदमुक्त गरेर संसदमा पठाएको सूचनालाई सभामुखले रोक्नै मिल्दैन तर, किन रोकियो रु एमालेको पत्रलाई किन वेवास्ता गरियो रु यस्तो पनि सभामुखको भूमिका हुन्छ रु नेता पौडेलको आक्रोस थियो । सभामुखले पदको दुरुपयोग गरेर संविधान विपरितका गतिविधि गरिरहेको नेता पौडेलको दाबी थियो ।

लुम्बिनी प्रदेशमा विभाजनको प्रभाव छैन
नेता पौडेलले लुम्बिनीमा नेकपा एमालेमा ल्याउन खोजिएको विभाजनको कुनै असर नपरेको दावी गरेका छन । उनले भने–‘विग्रहको अपेक्षा नगरेपनि हुन्छ, विभाजन ल्याउने आँट नगरे हुन्छ, यहाँ पतनको बाटोमा कोही हिंड्न तयार हुँदैनन् ।’ लुम्बिनी प्रदेश कमिटीको बैठकले त्यो सन्देश दिएको नेता पौडेलको भनाइ छ । उनले लुम्बिनी प्रदेशका आमकार्यकर्ताले विभाजनको कुनै पनि प्रयास सफल हनु नदिने बताए । अहिले आफूहरु प्रतिपक्षी भूमिकामा भएपनि आगामि निर्वाचन मार्फत पुन सरकारमा जाने गरि पार्टी गतिविधि गर्ने उनले बताए ।

‘संसदीय अंकगणितले के देखाउछ, त्यो अर्को पाटो हो, तर हामी नेपालको ठूलो दल हो, हामी राष्ट्रिय स्तरको लिड पार्टीका हौं’ उनले भने ।१० बुँदे सम्झौतालाई सकरात्मक रुपमा लिएर रचनात्मक रुपमा कार्यान्वयन गर्ने निर्णय गरेको छ । प्रेस चौतारी नेपाल रुपन्देहीका अध्यक्ष अमृत गिरीको अध्यक्षता तथा सचिव सम्झना शर्माको सञ्चालनमा कार्यक्रम सम्पन्न भएको थियो ।

प्रतिक्रिया दिनुहोस्

सम्बन्धित शीर्षकहरु