add frist

गृहपृष्ठ तिलोत्तमाका काँग्रेस उम्मेदवार खाणद्वारा कुलोको जग्गा कब्जा गरी व्यावसायिक भवन निर्माण

तिलोत्तमाका काँग्रेस उम्मेदवार खाणद्वारा कुलोको जग्गा कब्जा गरी व्यावसायिक भवन निर्माण

"निजी पर्खाल लगाउन समेत सरकारी बजेट"

तिलोत्तमा, २७ बैशाख । तिलोत्तमा नगरपालिकामा नेपाली काँग्रेसका तर्फबाट मेयरका उम्मेदवार रामकृष्ण खाणले सोह्र–छत्तीस सिंचाई प्रणालीको जग्गा अतिक्रमण गरी मापदण्ड विपरित व्यावसायिक भवन निर्माण गरेको पाइएको छ । उक्त भवनमा खाणले आठवटा सटर बनाएर प्रति सटर आठ हजार रुपियाँका दरले भाडामा लगाएका छन् ।

मापदण्ड विपरित सिंचाई कुलोको जग्गा अतिक्रमण गरी भवन निर्माण गरिएपछि नगरपालिकाले नक्शा पास गरेको छैन । नगरपालिकाले पटक पटक निर्माण कार्य रोक्न आग्रह गर्दा पनि नमनेपछि नक्शापास नगरेको हो । बुटवल उपमहानगरपालिका वडा नम्बर ११ सिद्धनगरमा काँग्रेस उम्मेदवार खाणले कुलो अतिक्रमण गरी व्यावसायिक भवन निर्माण गरेका हुन् ।

करिव १२ धुर क्षेत्रफलमा निर्माण गरिएको भवनमा रहेका आठवटा सटरहरुमा किराना पसल, रेष्टुरेन्ट, सैलुन, मासु पसल लगायतका व्यवसाय सञ्चालनमा छन् । ती सटरहरुबाट काँग्रेस उम्मेदवार खाणले मासिक ६४ हजार भाडा बुझ्दै आएको स्थानीय बताउँछन् ।

बुटवल उपमहानगरपालिका वडा नम्बर ११ का निवर्तमान वडाअध्यक्ष रामचन्द्र क्षेत्रीले नगरपालिकाबाट मापदण्ड पु¥याएर मात्र भवन निर्माण गर्न पटक पटक आग्रह गर्दा पनि अटेर गरेपछि नक्शापास नै नगरिदिएको बताए । “म वडाअध्यक्षमा बहाल हुँदा नै एक वर्षअघि उक्त भवन निर्माण भएको हो, नगरपालिकाले पटकपटक मापदण्ड पु¥याएर र कुलोको जग्गा अतिक्रमण नगरी भवन निर्माण गर्न आग्रह गर्दा पनि घरधनीले सुनेनन्, त्यसैले नक्शापास नै नभएको हो”–उनले भने ।

उक्त भवन निर्माण गर्दा खाणले राईट अफ वे पनि छोडेका छैनन् । खाणले सिंचाई गर्ने कुलोको जग्गा अतिक्रमण गरेपछि तिलोत्तमा नगरपालिकाका किसानहरु रुष्ट छन् । तिलोत्तमा नगरका किसानहरु उक्त कुलोबाट हुने सिंचाईमा आश्रित छन् ।

सोह्र मौजा सिंचाई प्रणालीका पुर्व अध्यक्ष माधव पाठकले कुलोको जग्गा कब्जा गरेर भवन बनाएको भन्दै आफूहरुले पटक पटक रोक्न खोज्दा पनि अटेर गरेको बताए । “किसानले खेती गर्ने कुलोको जग्गा कब्जा नगर्नुस् भनेर हामीले पटक पटक आग्रह ग¥यौं, तर मानेनन्, जग्गा मिचिएपछि यो कुलोबाट सिंचाई गर्ने किसान पनि चिन्तित बनेका छन्”–उनले भने ।

खाणले त्यहाँ रहेको आफ्नो जग्गालाई समेत सुरक्षित गर्न सरकारी बजेट ल्याएर पर्खाल लगाएका थिए । २०७३ सालमा आफ्ना दाई बालकृष्ण खाण सिचाईमन्त्री भएको बेला उनले तीनलाख बजेट पारेका थिए । तर सोह्र मौजा सिंचाई प्रणालीको व्यापक विरोध भएपछि सिंचाई विभागमार्फत आएको उक्त बजेट निकाशा नभै फ्रिज भएको थियो । त्यसपछि अर्कोवर्ष सिंचाईमन्त्री खाणमार्फत रामकृष्णले फेरि तीनलाख बजेट पारे र आफ्नो जग्गा सुरक्षित गर्न भन्दै पर्खाल लगाए ।

त्यतिबेला सोह्र मौजा सिंचाई प्रणालीले त्यहाँ रहेका अन्य व्यक्तिको जग्गाको सुरक्षाका लागि पनि पर्खाल लगाउनुपर्ने भन्दै बजेट माग गरेको भएपनि सरकारले उपलव्ध नगराएको पाठक बताउँछन् । “तर कुनै एकजना व्यक्तिको पहुँचको आधारमा निजी जग्गामा सरकारी पैसा खर्च गरेर पर्खाल लगाउने काम भयो”–उनले भने ।

यस विषयमा काँग्रेस उम्मेदवार खाणले भने त्यो भवन आफ्नो नभई ससुरालीको भएको प्रतिक्रिया दिए । त्यहाँ बाटोको पनि नक्सा नकाटिएको भन्दै उनले कुलोको जग्गा पनि नमिचिएको दावी गरे । “त्यो जग्गा मेरो नाममा छैन, त्यो ससुरालीको जग्गा हो, त्यहाँ एकतले टिनको टहरो निर्माण गरी व्यावसायिक सटर बनाइएको साँचो हो, तर कुनै पनि मापदण्ड मिचिएको छैन”–उनले भने ।

प्रतिक्रिया दिनुहोस्

सम्बन्धित शीर्षकहरु