जेनजी प्रदर्शन : १९ जनाको मृत्यु, सयौं घाइते

काठमाडौं । सामाजिक सञ्जाल बन्द र शासकीय अव्यवस्थाविरुद्ध जेनजी युवाहरूले थालेको प्रदर्शनमा प्रहरीले गोली चलाउँदा अहिलेसम्म १९ जनाको मृत्यु भएको छ ।

घटनामा ट्रमा सेन्टरमा ८, एभरेस्ट अस्पतालमा ३, सिभिल अस्पतालमा ३, त्रिवि शिक्षण अस्पतालमा १, केएमसीमा २ र इटहरीमा २ जनाको मृत्यु भएको छ । प्रहरी गोली लागेर घाइते भएकामध्ये हाल ३४७ जनाको उपचार विभिन्न अस्पतालमा भइरहेको छ ।

घाइतेहरूको विवरण यस प्रकार छ । सिभिल अस्पतालमा १००, ट्रमा सेन्टरमा ५९, एभरेस्ट अस्पतालमा १०२, केएमसीमा ३७, वीर अस्पतालमा ६, पाटन अस्पतालमा ४, त्रिवि शिक्षणमा १८, नर्भिकमा ३, बीपी प्रतिष्ठानमा २, गण्डकी मेडिकल कलेजमा १, विराट मेडिकल कलेजमा ४ र दमक अस्पतालमा ७ जना घाइते उपचाररत छन् ।

एभरेस्ट अस्पतालका अधिकारी अनिल अधिकारीका अनुसार त्यहाँ ४ जना गम्भीर अवस्थामा छन् । ट्रमा सेन्टरका डा। दीपेन्द्र पाण्डेका अनुसार १० जना गम्भीर घाइते भएकामा उनीहरूको टाउको र छातीमा गोली लागेको छ ।

प्रदर्शनकारीमाथि प्रहरीले पानीका फोहरा, अश्रुग्यास र गोली प्रहार गरेको थियो । जेनजी युवा आन्दोलनका क्रममा देशका मुख्य सहरहरूमा विरोध प्रदर्शन जारी रहेको छ ।

प्रहरी र अस्पतालका अधिकारीहरूले घटनाको थप विवरण र अनुसन्धान जारी रहेको बताएका छन् ।