रवि लामिछानेलाई थुनामुक्त नगर्न सर्वोच्चको आदेश

बुटवल । सर्वोच्च अदालतले राष्ट्रिय स्वतन्त्र पार्टी (रास्वपा)का सभापति एवं पूर्व उपप्रधान तथा गृहमन्त्री रवि लामिछानेलाई थुनामुक्त गर्न अस्वीकार गरेको छ ।

न्यायाधीश नहकुल सुवेदी र बालकृष्ण ढकालको संयुक्त इजलासले शुक्रबार जारी गरेको आदेशमा उच्च अदालत तुलसीपुरको बुटवल इजलासले लामिछानेलाई पुर्पक्षका लागि थुनामा पठाउने निर्णय कानुनसम्मत भएको उल्लेख गरिएको छ ।

गत वैशाख ७ गते लामिछानेका तर्फबाट पत्नी निकिता पौडेलले दायर गरेको बन्दी प्रत्यक्षीकरण रिटमाथिको तीन दिनको बहसपछि इजलासले फैसला सुनाएको हो । आदेश शुक्रबार राति पौने ९ बजे सर्वोच्च अदालतबाट सार्वजनिक भएको हो ।

लामिछाने बुटवलको सुप्रिम सहकारी प्रकरणमा ठगी र संगठित अपराधसम्बन्धी मुद्दामा हाल रुपन्देही कारागारमा थुनामा छन् । यसअघि रूपन्देही जिल्ला अदालतले उनलाई एक करोड धरौटीमा छाड्न आदेश दिएको थियो । सो आदेशविरुद्ध सरकारी वकिलको कार्यालयले रिट दर्ता गरेपछि उच्च अदालतले पुर्पक्षका लागि थुनामा पठाउने आदेश दिएको थियो ।