शिक्षकको कार्यसम्पादन मूल्यांकन अंक ८० मा झार्ने सहमति, बढुवा तीन आधारमा हुने

काठमाडौं । विद्यालय शिक्षासम्बन्धी विधेयकमा समेटिएको शिक्षक कार्यसम्पादन मूल्यांकनसम्बन्धी प्रावधानमा सहमति जुटेको छ ।

संसद्को शिक्षा, स्वास्थ्य तथा सूचना प्रविधि समितिमा समितिको बिहीबार बसेको बैठकमा पाँच वर्षे कार्यसम्पादन मूल्यांकनको अधिकतम अंक ९० बाट घटाएर ८० मा झार्ने सहमति भएको हो ।

बैठकमा शिक्षक महासंघको सदस्यता सम्बन्धी एउटा बुँदा पनि पारित भएको छ। अब प्रधानाध्यापक नियुक्त भएपछि सम्बन्धित व्यक्तिको शिक्षक महासंघको सदस्यता स्वतः निष्क्रिय हुने व्यवस्था विधेयकमा समावेश गरिएको छ ।

यस्तै, शिक्षकको बढुवासम्बन्धी व्यवस्था पनि पुनः परिमार्जन गर्दै तीनवटा आधारमा बढुवा गर्ने प्रस्ताव बैठकबाट पारित भएको छ ।

अब आन्तरिक प्रतियोगिता, जेष्ठता तथा कार्यसम्पादन र कार्यक्षमता मूल्याङ्कनका आधारमा बढुवा हुने व्यवस्था विधेयकमा प्रस्ताव गरिएको छ। यसअघि यो प्रक्रिया आन्तरिक प्रतियोगिता र आवधिक बढुवासम्म सीमित थियो ।

समितिको परामर्श उपसमितिमा सहमति जुटाइसकेको प्रस्तावलाई औपचारिक रूपमा समितिको बैठकले अनुमोदन गरेसँगै अब विधेयकको मस्यौदा अन्तिम रूपतर्फ उन्मुख भएको छ ।