प्रेस युनियन रुपन्देहीको सभापतिमा कल्पना तिवारी निर्वाचित

बुटवल । नेपाल प्रेस युनियन रुपन्देहीको सभापतिमा कल्पना तिवारी निर्वाचित भएकी छन् । नेपाल प्रेस युनियन रुपन्देहीको २२ औँ साधारणसभा तथा १० औँ अधिवेशनबाट तिवारी सभापतिमा निर्वाचित भएकी हुन् ।

मंगलबार भएको मतदानमा तिवारीले ५५ मत प्राप्त गर्दा सभापतिका अर्का प्रत्याशी दीपक घिमिरेले ४४ मत प्राप्त गरे ।

यस्तै, सचिवमा राम भण्डारी निर्वाचित भएका छन् । सचिव पदका अर्का प्रत्याशी प्रदीप आचार्यलाई एक मतको अन्तरले पराजित गर्दै भण्डारी निर्वाचित भएका हुन् । भण्डारीले ५० मत प्राप्त गर्दा आचार्यले ४९ मत पाए ।

उपाध्यक्षमा रमेश अर्याल (खुला), सीता गौतम बराल (महिला) र तिलक सुवेदी (समावेशी) सर्वसम्मत चयन भएका छन् ।

यस्तै, कोषाध्यक्षमा कल्पना शर्मा तथा सहसचिवमा बसन्तराज बराल र सृष्टि अधिकारी भुसाल चयन भएका छन् । कार्यसमिति सदस्यमा सन्तकुमार श्रेष्ठ र नवीन राना निर्विरोध निर्वाचित भएका छन् ।

सभापति र सचिवबाहेक अन्य पदमा सर्वसम्मत नेतृत्व चयन भएको निर्वाचन समितिका संयोजक जीवनारायण अधिकारीले जानकारी दिए ।

अधिवेशनले नेपाल प्रेस युनियनको केन्द्रीय महाधिवेशन प्रतिनिधि तथा प्रदेश महाधिवेशन प्रतिनिधिसमेत सर्वसम्मत चयन गरेको छ ।

नवनिर्वाचित नेतृत्वले पत्रकारको व्यावसायिक हकहित, पत्रकारिता क्षेत्रको मर्यादा र संगठनको सुदृढीकरणका लागि प्रभावकारी भूमिका निर्वाह गर्ने अपेक्षा गरिएको छ ।