डायमण्ड मा.वि. द्वारा राहत कोषमा ५ लाख सहयोग

पोखरा । पोखरा–२७, तालचोकस्थित डायमण्ड माध्यमिक विद्यालयले भोटेकोसीको बाढीपहिरो प्रभावित नागरिकका लागि प्रधानमन्त्री दैवी प्रकोप उद्धार कोषमा ५ लाख रुपैयाँ सहयोग गरेको छ । विपद्को घडीमा प्रभावितप्रति सामाजिक उत्तरदायित्व प्रस्तुत गर्दै विद्यालयले उक्त राहत रकम प्रदान गरेको हो ।

संकलित रकम संस्थागत माध्यमबाट राहत कोषमा उपलब्ध गराइएको छ । विद्यालयका प्रधानाध्यापक याम रोकाका अनुसार हिसान कास्कीमार्फत ३ लाख रुपैयाँ र प्याब्सन कास्कीमार्फत २ लाख रुपैयाँ गरी कुल ५ लाख रुपैयाँ प्रधानमन्त्री राहत कोषमा बुझाइएको हो ।

उक्त रकम विद्यालयका विद्यार्थी, शिक्षक, कर्मचारी तथा विद्यालय स्वयंको संयुक्त योगदानबाट संकलन गरिएको हो । यो सहयोग विपद्मा परेका नेपाली दाजुभाइ तथा दिदीबहिनीप्रतिको ऐक्यबद्धता, मानवीय संवेदना र राष्ट्रिय जिम्मेवारीको अभिव्यक्ति भएको विद्यालयले जनाएको छ ।