तीजको खर्च कटौती गरी दशरथ टोल विकास संस्थाद्वारा बाढीपीडितलाई सहयोग

बुटवल । बुटवल–८,सुख्खानगरस्थित दशरथ टोल विकास संस्थाले हिन्दू नारीहरूको महान् पर्व हरितालिका तीजको खर्च कटौती गरेर भोटेकोशी बाढी–पहिरो प्रभावितहरूका लागि आर्थिक सहयोग प्रदान गरेको छ ।

संस्थाले तीजको अवसरमा हुने फजुल खर्चलाई कटौती गर्दै भोटेकोशीको बाढी र पहिरोबाट प्रभावित भएका परिवारहरूको राहत तथा सहयोगका लागि रु. २१,५००/- ( एकाइस हजार पाँच सय रुपैया) रकम हस्तान्तरण गरेको हो ।

विपद्को यस कठिन घडीमा प्रभावित नागरिकको पीडामा मलम लगाउने र साथ दिने उद्देश्यले यो सहयोग गरिएको संस्थाकी अध्यक्ष कल्पना अर्यालले जानकारी दिनुभयो ।

अध्यक्ष अर्यालका अनुसार तीज जस्तो पर्वको फजुल खर्च बचाएर गरिएको यो सानो प्रयत्नले संकटमा परेकाहरूलाई राहत पुग्नुका साथै समाजमा मानवीय सेवा र सद्भावको भावनालाई अझ मजबुत बनाउने विश्वास लिइएको छ । सहयोगी हातहरू नै मानवताको वास्तविक पहिचान हुन्, उहाँले भन्नुभयो ।

विपद्को समयमा टोल विकास संस्थाले देखाएको यो अग्रसरता र सामाजिक उत्तरदायित्वको स्थानीयस्तरमा प्रशंसा भएको छ ।