सिद्धबाबा क्षेत्रमा कारमाथि पहिरोसँगै ढुङ्गा खस्दा तीन जना घाइते

बुटवल । सिद्धबाबा क्षेत्रमा कारमाथि पहिरोसँगै ढुङ्गा खस्दा तीन जना घाइते भएका छन् । आज बेलुकी साढे ६ बजेतिर पाल्पा-बुटवल सडकखण्डअन्तर्गत तिनाउ गाउँपालिका-३, माथिल्लो सिद्धबाबा मन्दिर (झरना) नजिकै दुर्घटना भएको हो। पाल्पाबाट बुटवलतर्फ आउँदै गरेको बा २० च ३९९९ नम्बरको कारमाथि अचानक सडक माथिबाट ढुङ्गा खसेको थियो।

दुर्घटनामा परेर घाइते हुनेहरूमा:

राज कुमार लोध (३६ वर्ष): कार चालक, शुद्धोधन गाउँपालिका-२ कोलुवा, रुपन्देही (अवस्था सामान्य)

जुलन गैरे (३७ वर्ष): बुटवल उपमहानगरपालिका-७ दीपनगर, रुपन्देही (अवस्था गम्भीर)

राधिका ढकाल (६२ वर्ष): बुटवल उपमहानगरपालिका, जेसिज चोक, रुपन्देही (अवस्था गम्भीर)

जिल्ला प्रहरी कार्यालय पाल्पाका अनुसार घाइते सबैको बुटवल अस्पताल प्रालिमा उपचार भइरहेको छ । ढुङ्गाको ठक्करबाट कार पूर्ण रूपमा क्षतविक्षत भएको छ ।