गण्डक ब्यारेजमा २ लाख ७३ हजार क्युसेक पानीको प्रवाह, खतरा सूचकनजिक

फाइल तस्बिर

काठमाडौं । नेपाल/भारत सीमा क्षेत्रमा पर्ने गण्डक ब्यारेजमा पानीको बहाव बढेको छ । शनिबार बिहान ९ बजेको विवरणअनुसार गण्डक ब्यारेजबाट २ लाख ७३ हजार ६ सय क्युसेक पानी प्रवाह भइरहेको छ ।

गण्डक ब्यारेज, वाल्मीकिनगरका अनुसार ब्यारेजको माथिल्लो तटीय क्षेत्रमा पानीको सतह ३५९.४० फिट र तल्लो तटीय क्षेत्रमा ३५६.८० फिट मापन गरिएको छ। ब्यारेजको तल्लो तर्फ पनि २ लाख ७३ हजार ६ सय क्युसेक पानीको बहाव रहेको छ ।

गण्डक ब्यारेजको संरचना पुरानो भएकाले ३ लाख क्युसेक पानीको प्रवाहलाई खतराको सूचक मानिँदै आएको छ। हाल ब्यारेजमा प्रवाह भइरहेको पानीको मात्रा उक्त सीमाभन्दा करिब २६ हजार ४ सय क्युसेक कम छ ।

यसैबीच, नेपालतर्फ देवघाटमा बिहान ८:३५ बजे ३ लाख ४८ हजार क्युसेक पानीको बहाव मापन गरिएको छ । देवघाटको बहाव बढ्दो क्रममा रहेको विवरणमा उल्लेख छ ।

देवघाटमा मापन भएको पानीको बहाव गण्डक ब्यारेजतर्फ समेत प्रभाव पार्न सक्ने भएकाले ब्यारेज र तल्लो तटीय क्षेत्रमा पानीको सतह तथा बहाव थप बढ्न सक्ने अवस्था रहेको छ ।

 

बाढीको सम्भावित जोखिमलाई ध्यानमा राख्दै गण्डक ब्यारेज तथा नारायणी नदीको तल्लो तटीय क्षेत्रमा रहेका बासिन्दालाई नदीको बहाव र जलस्तरमा हुने परिवर्तनप्रति सतर्क रहन आग्रह गरिएको छ।

 

२०८० साल साउन २९ गते पनि २ लाख ७३ हजार ६ सय क्युसेक प्रतिसेकेन्ड पानी प्रवाह हुँदा ब्यारेजका ३६ वटै ढोका खोलिएको थियो ।