गुल्मीका चार सय घरधुरी अन्धकारमा

गुल्मी । गुल्मीको ह्वाङ्गदी स्थित महभिर गाउँमा मंगलबार अविरल वर्षा सँगै झरेको पहिरोले ३ घरधुरी विस्थापित भएका छन् । मालिका गाउँपालिका वडा नम्बर ३ मा पर्ने ह्वाङ्गदीको महभिर गाउँका ७ घरधुरी उच्च जोखिममा परेका छन् ।

बिद्युतका पोल ढलेर त्यस वडाका ४ सय भन्दा बढी घरधुरी अँध्यारोमा बस्न बाध्य भएका छन् । १५ घरधुरीका पिउने पानीको ट्याङ्की बाढीले बगाएर ती परिवारलाई खानेपानीको अभाव भएको त्यहाँका वडा सदस्य शेरबहादुर थापाले जानकारी दिए ।

गत वर्ष मात्रै १० लाख खर्चेर बनाइएको ५ घना मिटरको खानेपानी ट्याङ्की बगाएर पुर्णरुपमा क्षति भएको छ । त्यस्तै ३ घना मिटरको पुरानो ट्याङ्की पनि बगाएर क्षति भएको छ ।

त्यस वडाका पूर्व वडाध्यक्ष राजकुमार बिक , ढालबहादुर विश्वकर्मा र अजय घर्तीको घर ढल्नै लागेको छ । सात घरधुरीलाई मालिका गाउँपालिकाले त्रिपाल वितरण गरेको वडा सदस्य थापाले बताए । बिद्युत् र खानेपानी सुचारु गर्ने पहल भई रहेको वडाध्यक्ष तथा त्यस पालिकाका प्रवक्ता ज्ञानकुमार बुढा मगरले बताए ।