इमेज सहकारी ठगी अभियोगमा फरार ढोरपाटनका मेयर देवकुमार दिल्लीमा भेटिए

पोखरा । ढोरपाटन नगरपालिका नगर प्रमुख तथा इमेज बचत तथा ऋण सहकारी संस्थाका संस्थापक अध्यक्ष देवकुमार नेपाली फरार भएको १६ महिनापछि बल्ल पक्राउ परेका छन् ।

भारतको नयाँ दिल्लीबाट सुरक्षा अधिकारीहरुले पक्राउ गरेको र नेपाल ल्याउने तयारी भएको छ । सहकारी ठगी अभियोगमा फरार प्रतिवादी नेपालीलाई लामो समयसम्म नभेटिएपछि पक्राउका लागि गत वर्ष १२ माघ इन्टरपोलमा रेड नोटिस समेत जारी भएको थियो ।

प्रहरी स्रोतका अनुसार उनलाई भारतस्थित नेपाली दूतावासबाट समन्वय नेपाल झिकाउने तयारी भएको छ । बचतकर्ताको करिब २ अर्ब रकम अपचलन गरेको अभियोगमा लागेका नेपाली गत वर्ष ५ जेठदेखि फरार थिए ।

तर नेपाली बेलाबेलामा फेसबुक लाइभमा आउने र आफ्नो जीउधनको सुरक्षा नभएकाले केही समय टाढा बस्नुपरेको बताउने गर्थे ।

सहकारी रजिस्ट्रारको कार्यालयले गरेको अध्ययनमा उनले पोखरासहित बागलुङ, बुर्तीबाङ, गल्कोटमा गरी कृत्रिम कर्जा खडा गरी मोटो रकम उठाएर हिनामिना गरेको उल्लेख छ ।

उनी गत वर्ष ५ मंसिरमा पहिलोपल्ट सामाजिक सञ्जाल फेसबुकमा लाइभ आएर एकै पटक धेरै जना बचतकर्ताले बचत फिर्ता माग्न आउँदा सहकारी समस्यामा परेको दाबीसमेत गरेका थिए ।