बुटवलको बुद्धनगर पुलबाट तिनाउ नदीमा फाल हालेका पुरुष बेपत्ता

बुटवल । बुटवल उपमहानगरपालिका–११ स्थित बुद्धनगर पुलबाट बिहीबार साँझ एक पुरुष तिनाउ नदीमा फाल हालेर बेपत्ता भएका छन् ।

साँझ करिब ६ बजेको समयमा ४० देखि ४५ वर्ष उमेर समूहका देखिने ती पुरुषले पुलबाट फाल हालेका हुन् ।

प्रत्यक्षदर्शीका अनुसार पुलमा पुगेका ती पुरुषलाई स्थानीय तथा राहगीरले सम्झाई-बुझाई गरेर रोक्ने प्रयास गरेका थिए। तर, सम्झाउँदा-सम्झाउँदै उनले अचानक पुलबाट नदीमा फाल हालेको प्रत्यक्षदर्शीले बताएका छन् ।

घटनालगत्तै नेपाल प्रहरी, नेपाली सेना र सशस्त्र प्रहरीको टोली घटनास्थलमा पुगेर खोजी कार्य सुरु गरेको छ । बेपत्ता पुरुषको पहिचान भने अझै खुल्न सकेको छैन ।

सुरक्षाकर्मीको टोलीले पुल आसपास तथा तिनाउ नदीको तटीय क्षेत्रमा खोजी कार्य जारी राखेको स्थानीय प्रहरीले जनाएको छ ।